«Бүлүү» айан суолугар саахалга 16 киһи эмсэҕэлээтэ

16 киһи, ол иһигэр биэс оҕо «Бүлүү» айан суолугар тырааныспар икки саахалыгар эмсэҕэлээтэ. Бу туһунан Россия ис дьыала министиэристибэтин Саха сиринээҕи салаатын пресс-сулууспата иһитиннэрэр.

Тохсунньу 9 күнүгэр 15:20 чааска айан суолун 130-с килэмиэтиригэр «Тойота Королла Филдер» массыына суол эригииригэр сатаан салайбакка утары балаһаҕа тахсан «Тойота Ипсуму» кытта харсыста. Суол быһылаанын түмүгэр, 1971 сыллаах төрүөх «Тойота Ипсум» суоппара медицинэ тэрилтэтигэр тиийбэккэ тыына быһынна.

Билиҥҥи туругунан, «Филдер» суоппара реанимацияҕа сытар, саахал кэмигэр массыына иһигэр соҕотоҕо бэлиэтэнэр. Маны таһынан, «Ипсумунан» айаннаан испит алта киһи балыыһаҕа сытар, ол иһигэр биир сокуоннай сааһын ситэ илик оҕо.

Иккис суол саахала федеральнай айан суолун 150-с килэмиэтиригэр 18:00 чааска таҕыста. Барыллааһын дааннайынан «Субару Импреза» суоппара утары балаһаҕа тахсыбыт уонна «Тойота Хайс» микрооптуобуһу кытта харсыспыт.

«Айан суолугар микрооптуобуһунан айаннаан испит биэс киһи уонна кыра массыынаҕа олорсон испит түөрт киһи, ол иһигэр түөрт сокуоннай саастарын ситэ иликтэр», — диэн иһитиннэриигэ этиллэр.

Эмсэҕэлээбит дьону медицина тэрилтэтигэр тириэртилэр.

Миэстэтигэр ГИБДД үлэһиттэрэ быһылаан тахсыбыт биричиинэтин быһаараллар.