«Бүлүү» федеральнай суол 983 килэмиэтиригэр өрөмүөн бүттэ

НВК САХА — «Бүлүү» федеральнай суол Сунтаар улууһугар киирсэр Күккүрэ үрэҕинэн ааһар тутуутун болдьохтоммут кэмтэн балтараа ый эрдэ оҥорон бүтэрдилэр. Бу туһунан Ил Дархан уонна бырабыыталыстыба пресс-сулууспата иһитиннэрэр.

«Бүлүү» федеральнай суол управлениета иһитиннэрэринэн, айан суолун 983-с килэмиэтиригэр ыытыллар өрөмүөн үлэтэ алтынньы 31 күнүгэр диэри болдьохтоох эбит. Ол эрээри үлэ балаҕан ыйын 18 күнүгэр номнуо түмүктэннэ.

«Ыытыллыбыт үлэ түмүгэр 2,44 килэмиэтир усталаах суол учаастага өрөмүөннэннэ. Учаастак III-с техническэй категорияҕа тиэрдиллэр: 7,0 миэтэрэ кэтиттээх асфальт бүрүөһүнэ уурулунна, 2,0 м. диаметрдаах уу аһардар турбалар уонна тимир хахха туруорулуннулар», — диэн «Бүлүү» федеральнай суол управлениета тириэрдэр.

Өрөмүөн үлэтэ ыытыллыан иннинэ бу учаастакка таһаҕас массыыналарын сатаан аһардыбат, икки хаарбах турукатаах мас муоста турбута.