Бүтүн Россиятааҕы онлайн-выпускной бэс ыйын 25 күнүгэр буолуоҕа

Бүтүн Россиятааҕы оскуоланы бүтэрээччилэр бырааһынньыктара бэс ыйын 25 күнүгэр онлайн көрүҥүнэн ыытыллыаҕа.

Бу туһунан Россия үөрэҕириигэ министиэристибэтэ YouTube аккауна иһитиннэрэр.

«Дойду бары үөрэнээччилэригэр бэс ыйын 25 күнүгэр ыытыллар тэрээһиҥҥэ Россия үөрэҕириигэ миниистирэ Сергей Кравцов эҕэрдэтинэн бүтүн Россиятааҕы выпускной аһыллыаҕа», — диэн иһитиннэриигэ этиллэр.

Маны тэҥэ Россия киинэтин, театрын уонна эстрадатын сулустара, учууталлар, выпускниктара — аан дойдутааҕы олимпиадалар, үөрэх куонкурустарын кыттыылаахтара кытталлар. Маны таһынан бу күн араас аахсыйалар уонна эҕэрдэ марафоннара ыытыллар.