Балаҕан ыйын 1 күнүгэр Россияҕа саҥа үөрэх дьыла саҕаланар. Үгэс быһыытынан бу күн оскуолаларга бырааһынньыктааҕы линиэйкэлэр, кылаас чаастар, билии уруоктара ыытыллаллар.
Бүгүн Саха сирин 15 650 кырачааныгар маҥнайгы чуораан чугдаарыаҕа, кинилэр аан бастаан маҥнайгы учууталларын кытта долгуйа көрсүөхтэрэ.
11 кылааска тахсыбыт 8 тыһыынча үөрэнээччигэ түмүктүүр тургутууларга бэлэмнэнэр эппиэттээх кэм тиийэн кэллэ.
Өрөспүүбүлүкэ үрдүнэн идэтийбит орто үөрэх тэрилтэлэрин бастакы кууруһун 6,7 тыһыынча уонна үрдүк үөрэх кыһаларын 6 тыһыынча устудьуона талан ылбыт идэлэрин баһылыырга бастакы хардыыны оҥоруохтара.
Үөрэнээччилэргэ саҥа үөрэх дьылыгар саҥаттан саҥа арыйыылары, оттон учууталларга үлэлэригэр үрдүк ситиһиилэри!
