Балаҕан ыйын 26 күнүгэр Жатайга саҥа бассейн арыллыаҕа

НВК САХА — Саха Өрөспүүбүлүкэтин судаарыстыбаннаһын күнүгэр Жатай бөһүөлэгэр саҥа бассейн арыллыыта үөрүүлээх быһыыга-майгыга буолуоҕа. Тэрээһиҥҥэ Саха сирин Ил Дархана Айсен Николаев кыттыыны ылыаҕа. Бу туһунан Ил Дархан уонна бырабыыталыстыба пресс-сулууспата иһитиннэрэр.

«Саҥа бассейн харбааһын көрүҥүн дьарыктыыр киин, араас хабааннаах харбааһын күрэхтэһиилэрин ыытар былаһаакка, ону тэҥэ 10 тыһыынча кэриҥэ нэһилиэнньэлээх Жатай бөһүөлэгин олохтоохторо эти-хааны чэбдигирдэн сөтүөлүүр сирдэрэ буолуо», – диэн этиллэр.

Саҥа эбийиэккэ 25 миэтэрэ уһуннаах түөрт харбыыр суоллаах бассейн, ону тэҥэ эти-хааны эрчийэр саала баар буолуо. Тутуу уопсай иэнэ 1,5 тыһыынча миэтэрэҕэ тэҥнэһэр.

Бу тутуу «Спорт – олох нуормата» федеральнай бырайыак уонна «2016-2020 сылларга Россияҕа физкультура уонна спорт сайдыыта» Федеральнай целевой бырагыраамма чэрчитинэн тутулунна диэн бэлиэтэнэр.