Бороҕоҥҥо 450 миэстэлээх оскуоланы тутуохтара

Уус Алдан улууһун Бороҕонугар саҥа үс этээстээх 450 миэстэлээх оскуоланы тутуохтара. Бу туһунан өрөспүүбүлүкэтээҕи Госстройжилнадзор пресс-сулууспата иһитиннэрэр.

«Бырайыак быһыытынан, эбийиэк уопсай иэнэ 5,8 тыһыынча кв. миэтэрэҕэ тэҥнэһэр. Манна 17 үөрэнэр кэбиниэт, үс лабораторя, техническэй уонна техническэйэ суох үлэ мастарыскыайдара, спортивнай уонна гимнастическэй саалалар баар буолуохтара. 150 миэстэлээх остолобуой, билиотека, методическэй кэбиниэт, артистическай уонна подсобнай хостордоох 270 миэстэлээх актовай саала көрүллэр», — диэн этиллэр.

Ону таһынан пандустар, кэҥэтиллибит ааннаах санузеллар, лестничнай подьемниктар баар буолуохтаахтар. Аттынааҥҥы территориятыгар оонньуур комплекстар уонна физкультурно-спортивнай зона оҥоһуллуоҕа.

Тутуу улуус үрдүнэн саамай элбэх ахсааннаах үөрэнээччилээх Мүрү 2-с №-дээх оскуолатын территориятыгар ыытыллара былааннанар.