Чурапчы улууһугар дьоҕус комбикорм собуота аһыллыаҕа

Чурапчы улууһун Болугур нэһилиэгин «Мындаҕаайы» тыа хаһаайыстыбатын оҥорон таһаарар кооперативыгар дьоҕус комбикорм собуота аһыллыаҕа.

Бу сыал туоларын туһугар комбикорму оҥорон таһаарар оборудованиелары атыыластылар.

Оройуон баһылыга Андрей Ноговицын этэринэн, үрдүү турар сыана, ыарахан логистика уонна комбикорм хаачыстыбата мөлтөөбүт кэмигэр бэйэ оҥорор бородууксуйата балаһыанньаттан  таһаарыаҕа.

Ону сэргэ, 2021 сылга сэлиэнньэҕэ үлэһиттэргэ аналлаах түөрт кыбартыыралаах олорор дьиэ тутуута саҕаланыаҕа.

Кооператив үлэтин сүрүн эйгэтинэн ынах сүөһүнү иитии, эти, үүтү оҥорон таһаарыы, ону тэҥэ оту, сиилэһи соҕотуопкалааһыҥҥа үүнээйинэн дьарыктаныы буолар.

Санатан эттэххэ, «Саха» НКИХ ханаала өрөспүүбүлүкэҕэ бэйэ комбикормун сөргүтүү туһунан иһитиннэрбитэ.