Дмитрий Михалев гиирэ спордун аан дойдутааҕы Кубогар кыайда

Үөһээ Бүлүүттэн төрүттээх Дмитрий Михалев Санкт-Петербург куоракка ыытыллыбыт гиирэ спордун аан дойдутааҕы Кубогын II-с түһүмэҕэр кыһыл көмүһү ылары ситистэ. Бу туһунан «Спорт Якутии» иһиитннэрэр.

«Дмитрий Михалев 63 киилэҕэ диэри ыйааһыҥҥа уһун эргииргэ кыайыылаах буолла. Бэриллибит уон мүнүүтэҕэ 32-лии киилэлээх гиирэлэри 62-тэ өрө аста», — диэн иһитиннэриигэ этиллэр.

Бу көрдөрүүнэн кини аан дойду Кубогын хаһаайынынан, ону тэҥэ Саха сиринээҕи гиирэ спордун историятыгар норуоттар ардыларынааҕы кылаастаах иккис спорт маастара буолла.

Турнирга 85 киилэҕэ диэри ыйааһыҥҥа иккис, үһүс миэстэлэри саха спортсменнара Руслан Лугинов уонна Сандал Оконешников ыллылар.