Дмитрий Садовников: Куорат уулуссаларыттан бэйдиэ сылдьар ыттары тутуохха наада

Бүгүн брифиҥҥэ СӨ Бырабыыталыстыбатын бэрэссэдээтэлин бастакы солбуйааччы  Дмитрий Садовников өрөспүүбүлүкэ киинигэр бэйдиэ сылдьар ыттары тутар биригээдэни элбэтэр наадатын туһунан иһитиннэрдэ.

«Бүгүн Дьокуускай ипподромугар алдьархай таҕыста. Чугас дьонугар-сэргэтигэр дириҥ кутурҕаммын тиэрдэбин. Эһигини кытта тэҥҥэ курутуйабыт», — диэтэ кини.

Дмитрий Садовников өлүү биричиинэтин силиэстийэ быһаарыаҕа диэн эттэ. Бу куоракка ыттар дьоҥҥо саба түһүүлэрэ бастакы түбэлтэ буолбатаҕын бэлиэтээтэ.

«Куорат былааһа кэмигэр болҕомтолорун уурбатахтар дии саныыбын. Улахан эппиэтинэһи Саха Өрөспүүбүлүкэтин Ветеринария департамена сүгэр. Кинилэр бэйдиэ сылдьар ыттары көрө-истэ сылдьыахтаахтар этилэр», — диэн Дмитрий Садовников бэлиэтээтэ.

Кини этэринэн, кылгас болдьоххо Дьокуускай уулуссаларыттан бэйдиэ сылдьар ыттары тутуохха наада.

«Билигин саамай сүрүнэ диэн уопсай кыһалҕа тула түмсэн, киин куорат уулуссаларыттан бэйдиэ сылдьар ыттары тутуохха наада! Ыттары тутар биригээдэни элбэтиэххэ наада. Бары тиэхиньикэлэри мобилизациялыахтаахпыт уонна, биллэн турар, бэйдиэ сылдьар ыттары тутар пуун үлэтин көрүөххэ наада. Өрөспүүбүлүкэ Бырабыыталыстыбата быйыл тустаах көмөнү оҥоруоҕа», — диэн Дмитрий Садовников түмүктээтэ.