Дьокуускайга алтынньы 17 күнүгэр ыччакка үлэ, үөрэх пуорума ыытыллыаҕа

Дьокуускайга алтынньы 17 күнүгэр «Россия — мин устуоруйам» Историческай пааркаҕа ыччат карьератын пуорума ыытыллыаҕа.

Тэрээһин олохтоох бириэмэнэн 10.00 чаастан 17.00 чааска диэри буолуоҕа.

Пуорум кэмигэр туһааннаах үлэһиттэр дьарыктаах буолууга уонна быстах кэмҥэ эбэтэр бэйэҕэ табыгастаах үлэни буларга сүбэ-ама биэриэхтэрэ, резюме толорорго көмөлөһүөхтэрэ. Ону таһынан бэйэни билиһиннэрэргэ туохха ордук болҕомто ууруллуохтааҕын ыйан-кэрдэн биэриэхтэрэ.

Миэстэтигэр Уһук Илиҥҥэ киһи хапытаалын сайыннарыы Ааҕыныстыбатыттан, дьарыктаах буолуу кииниттэн кэлэн үлэлиэхтэрэ. Кэлбит дьон ханна үлэ миэстэтэ баарын билиэхтэрэ, ону таһынан идэ таһымыгар тургутук ааһыахтарын сөп.

Тэрээһин чэрчитинэн үлэ биэрээччилэр бэйэлэрин билиһиннэриэхтэрэ, ыччакка — үлэ уонна оскуолаҕа оҕолоругар үөрэх миэстэтин, идэтийии куурустарын дьаарбаҥката ыытыллыаҕа.