Дьокуускайга научнай коллаборация киинэ аһылынна

Алтынньы 6 күнүгэр Дьокуускайга «Хас биирдии оҕо ситиһиитэ» региональнай бырайыак чэрчитинэн Н.Г. Соломонов аатынан научнай коллаборация киинэ аһылынна. Бу туһунан СӨ Үөрэх министиэристибэтин пресс-сулууспата иһитиннэрэр.

Саҥа киин ХИФУ айылҕа үөрэҕин салаатын дьиэтигэр баар. Саҥа кииҥҥэ коворкинг сирэ, 25 миэстэлээх лекторий, көмпүүтэрдиир уонна саахыматтыыр сир тэрилиннэ. Лекторий үлэтигэр үнүбэрситиэт үлэһиттэрэ кыттыахтара уонна ХИФУ материальнай-техническэй базата туһаныллыа.

Лектория дириэктэрэ Правсковья Никифорова кэпсииринэн, Н.Г. Соломонов аатынан научнай коллаборация киинэ аныгы технологиялар ньымаларын туһанан, оскуола оҕолоро уонна учууталлар эбии үөрэхтээһин бырагыраамаларын олоххо киллэрэр сирдэрэ буолуо. Манна геннай инженерия, биотехнология, техниканы үлэлэтэргэ уонна IT технологияларга туһуламмыт наука уонна үөрэхтээһин тутаах хайысхаларынан үлэ ыытыллыа.

Манна хас да үөрэҕирии бырайыактарын олоххо киллэрии үлэтэ ыытыллыа: 5-9 кылаас оҕолоругар анаан «Оҕо үнүбэрситиэтэ» уонна 10-11 кылаас оҕолоругар — «Кыра академия». Ону тэҥэ «21-с үйэ педагогун үлэтэ» бырайыак чэрчитинэн уһуйааччылар идэлэрин таһымын үрдэтиэхтэрэ уонна эбии саҥа идэни баһылыахтара.

Научнай коллаборация киинигэр үгэс буолбут дьарыктартан ураты араас хабааннаах конференциялар, хакатоннар, аһаҕас лекциялар, оҕолорго уонна төрөппүттэргэ аналлаах маастар-кылаастар ыытыллыахтара.

«Үөрэҕирии» национальнай бырайыак 2019-2024 сыллары хабан ыытыллар. Бырайыак чэрчитинэн Россия үөрэҕирииитин таһымын үрдэтии уонна 10 бастыҥ үрдүк таһымнаах үөрэҕириилээх дойду ахсааныгар киирии былааннанар.