Дьокуускайга оҕо балконтан сууллуутунан силиэстийэ саҕаланна

Бүгүн, кулун тутар 31 күнүгэр Дьокуускай куорат Дзержинскэй уулуссатыгар турар элбэх этээстээх дьиэ балконуттан алта саастаах оҕо сууллубут.

«Оҕо үһүс этээс балконуттан иккис этээс таһымыгар баар оҕо уһуйаанын сарайыгар сууллубут. Эмэһэтин өттүн өлөрөн балыыһаҕа тиксэриллибит», — диэн СӨ доруобуйа харыстабылыгар министиэристибэтин пресс-сулууспата иһитиннэрэр.

«Сэсиэттэр ыҥырыыларынан суһал медицинскэй көмө биригээдэтэ кэлбит. Медиктэр бэлиэтээбиттэринэн уол оҕо тостуу эбэтэр атын ыарахан эт-хаан эчэйиитин ылбатах, эмэһэтин өттүн өлөрбүт», — диэн өрөспүүбүлүкэтээҕи силиэстийэлиир кэмитиэт пресс-сулууспата иһитиннэрэр.

Силиэдэбэтэллэр быһылаан бары өрүтүн олохтуохтара. Бэрэбиэркэ түмүгүнэн тустаах быһаарыы ылыллыаҕа. Силиэстийэ хамыыта силиэстийэлиир управление салайааччытын э.т. тус хонтуруолугар сылдьар.