Бүгүн, балаҕан ыйын 18 күнүгэр, өрөспүүбүлүкэ киин куоратыгар анал байыаннай дьайыыга кыттар байыастары өйүүр сыаллаах «Сылаас күһүн» диэн патриотическай аахсыйа саҕаланна.
«Балаҕан ыйын 18 күнүттэн алтынньы 10 күнүгэр диэри волонтердар сылаас таҥастаах баһыылкалары хомуйаннар, байыастарга ыытар буолуохтара. Байыастар наскыны, бэрчээккини, балаклаваны, термобельену уонна атын даҕаны сылаас таҥаһы кытары төрөөбүт дойдуларын, дьиэлэрин сылааһын билиэхтэрэ. Биһиги буойуттарбытыгар тус бэйэлэригэр өйдөбүнньүк малы ыытыахха сөп. Ол байыастар ис туруктарын бөҕөргөтүөҕэ. Биһиги уопсастыбанньыктарбытыгар уонна көмөлөһөр дьоҥҥо махталбытын тириэрдэбит. Бу билигин даҕаны байыастарыбытыгар анаан ыытыллар аахсыйаны өйүөхтэрэ диэн эрэнэбин», – диэн өрөспүүбүүкэтээҕи биир кэлим координационнай киин суһал штабын салайааччыта Георгий Куркутов бэлиэтээтэ.
Гуманитарнай көмөнү Дьокуускай куорат Орджоникидзе уулуссатын, 10-с нүөмэрдээх дьиэтигэр (Гражданскай авиация управлениетын дьиэтин хаҥас өттүнэн) 2-с этээскэ ылаллар.
