Дьокуускайга «Водоканал» буруйугар кирдээх уу тоҕунна

«Водоканал» акционернай уопсастыба буруйугар өрөспүүбүлүкэ киин куоратын сиригэр-уотугар кирдээх уу тоҕунна. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.

«»Водоканал» Дьокуускайга канализацияны киллэрэригэр кирдээх уу тоҕунна. Ол түмүгэр уопсайа 132 кв. миэтэрэ иэннээх сири киртиттэ», — диэн иһитиннэриигэ этиллэр.

Экспертэр түмүктэринэн, уу тохтубут миэстэтигэр буор боруобатын ыллылар. Ол курдук, кирдээх уу (аммоний) буору 1,7 төгүл киртиппитэ билиннэ.

Уопсай хорумньу 128 700 солк. буолла.

Айылҕа харыстабылын борокуратуурата суукка үҥсүбүт. Суут быһаарыытынан борокуруор ирдэбиллэрин толору толордулар.

Билиҥҥи кэмҥэ суут быһаарыыта сокуоннай күүһүгэр киирэ илик уонна эппиэккэ тардыллыан сөп.