Эдьигээҥҥэ ууттан киһини быыһаабыт устудьуоҥҥа бочуоттаах грамотаны туттардылар

Бүгүн, тохсунньу 14 күнүгэр, Быыһыыр сулууспа аатыттан Эдьигээнтэн төрүттээх устудьуон Павел Владимировка бочуоттаах грамотаны туттардылар. Кини муус анныгар түспүт киһини быыһаабыт. Бу туһунан сулууспа инстаграмыгар суруйбуттар.

22 саастаах Павел Владимиров Уус Алданнааҕы техникумҥа «защита в чрезвычайных ситуациях» исписээлинэскэ үһүс кууруска үөрэнэр.

Сэтинньи 11 күнүгэр кини дьонун кытта балыктыы барбыт. Өрүскэ ыраахтан мууһунан хааман иһэр киһини көрбүттэр. Сотору кэминэн киһилэрэ сүтэн хаалбыт, өйдөөн көрбүттэрэ, төбөтө уонна илиитэ эрэ көстөр эбит. Павел «Буранынан» чугаһаабыт, ол кэннэ сыылан киирэн куткатыттан тутан ууттан орообут. Ууга түспүт киһини чугастааҕы үүтээҥҥэ киллэрбиттэр.

Саха сиринээҕи быыһыыр сулууспа Павел эр быһыыта холобур эрэ буолар кыахтааҕын бэлиэтээбит.