Горнай улууһугар икки хочуолунайы гаас оттукка көһөрүөхтэрэ

Аһыма сэлиэнньэтин «Киин» уонна Бэрдьигэстээх сэлиэнньэтин «МПМК» хочуолунайдара 2019 сыл инвестиционнай бырагырааматын чэрчитинэн гаас оттугар көһүөхтэрэ. Бу туһунан СӨ баһылыгын уонна бырабыыталыстыбатын пресс-сулууспата иһитиннэрдэ.

Бэрдьигэстээх сэлиэнньэтин «Балыыһа комплекса» хочуолунайын убаҕас оттуктан гаас оттукка көһөрүү уонна «МПМК» хочуолунайы тутуу, улуус бүддьүөтүгэр сылга 27 мөлүйүөн кэриҥэ сууманы кэмчилиэ диэн бэлиэтэнэр. ОДьКХ инвестиция салаата суоттуурунан, эбийиэктэр ороскуоттара икки сыл иһигэр сабыллыа.

Саха сирин бырабыыталыстыбатын сорудаҕынан Бэрдьигэстээх «Балыыһа комплекса» хочуолунайын толору уларытыы үлэтэ ыытыллар. Сотору кэминэн тутууну таҥыы үлэтэ түмүктэниэ.

Ону тэҥэ өрөспүүбүлүкэ нэһилиэнньэлээх пууннарын гаас оттукка көһөрүү үлэтэ ыытыллар диэн бэлиэтэнэр. 2019 сыл атырдьах ыйыгар «Сибиир күүһэ» магистральнай гаас ситимин маҥнайгы кэрдииһэ үлэҕэ киириэ.

Ленскэй, Өлүөхүмэ, Алдан уонна Нерюнгри улуустарын гаастааһыҥҥа: 2,7 тыһыынча килэмиэтир усталаах магистральнай гаас ситимин, 1,7 тыһыынча килэмиэтир — гааһы туоратар турбалары, 1,5 тыһыынча килэмиэтир — нэһилиэнньэлээх пууннар истэринэн ааһар гаас ситимин тутуу үлэтэ былааннанар.

Хочуолунайдары ыарахан сыаналаах оттуктартан айылҕа гааһын уонна бэйэ хара чоҕун оттугар көһөрүү — ОДьКХ 2019-2023 сылларга ититии хайысхатыгар ыытар инвестиционнай быраагырааматын көдьүүстээх хайысхаларыттан биирдэстэр буолар.