МРОТ уонна тиийинэн олоруу алын кээмэйин улаатыннарарга 30 млрд. солк. ыытыахтара

Үлэ хамнаһын алын кээмэйин уонна тиийинэн олоруу алын кээмэйин улаатыннарарга 30 млрд. солк. ыытыахтара диэн РФ үлэҕэ уонна социальнай сайдыыга миниистирэ Антон Котяков иһитиннэрдэ.

Бу туһунан «Интерфакс» иһитиннэрэр.

«Бу быһаарыынан 16 мөл. олохтоох төлөбүрдэрэ улааталлар — бу оҕо пособиеларын, федеральнай уонна регионнааҕы социальнай эбии төлөбүрү, биэнсийэҕэ эбии төлөбүрү, быстах кэмнээх үлэтэ суох пособиены ылааччылар буолаллар», — диэтэ кини.

Эрдэ Владимир Путин 2022 сылга Россияҕа хамнас алын кээмэйин уонна тиийинэн олоруу алын кээмэйин 8,6 бырыһыан уларытыылары бэлэмнииргэ бырабыыталыстыбаны соруйбута.

Ол курдук, МРОТ 13 890 солк., оттон тиийинэн олоруу алын кээмэйэ 12 654 солк. диэри улаатыаҕа, 2021 сылга тэҥнээтэххэ 8,6 % улааппыт.

Ону тэҥэ араас социальнай пособиелар, ол иһигэр оҕолоох ыаллар төлөбүрдэрэ, социальнай эбии төлөбүрдэр, биэнсийэҕэ эбии төлөбүрдэр тиийинэн олоруу алын кээмэйиттэн тутулуктаах.

МРОТ кээмэйэ бастатан туран больничнай саамай кыра кээмэйин олохтуурга уонна хамнас төлөбүрүн кыра кээмэйэ буолар.