ХИФУ 550-тэн тахса устудьуона кыһыл диплому ылла

Быйыл Хотугулуу-Илиҥҥи федеральнай үнүбэрситиэт 558 выпускнига кыһыл диплому ылла. Бу туһунан ХИФУ пресс-сулууспата иһитиннэрэр.

Үнүрэбситиэккэ кыһыл дипломнары туттарыы үөрүүлээх тэрээһинэ ыытылынна.

«Бүгүн эһиги федеральнай үнүбэрситиэт дипломун ылаҕыт, ити кэннэ эһиги иннигитигэр аан барыта аһаҕас. Былырыыҥҥы выпускниктарга курдук, эһигиттэн үгүстэрэ дистанционнай үөрэххэ көһүүгэ түбэстилэр. Ол эрээри эһиги бука барытын кыайдыгыт: судаарыстыбаннай эксээмэннэри, квалификационнай үлэлэри ситиһиилээхтик туттардыгыт, онон эһигини барыгытынан улаханнык киэн туттабыт», – диэн выпускниктарга ХИФУ ректора Анатолий Николаев тыл эттэ.

СӨ үөрэҕин уонна наукатын миниистрэ Михаил Сивцев ХИФУ сыл аайы 3,5 тыһыынча үрдүк квалификациялаах исписэлиистэри таһаарар диэн бэлиэтээтэ.

«Кэтэхтэн үөрэнэр устудьуоннары аахтахха, оччоҕо 4,5 тыһыынча кэриҥэ киһи буолан тахсар. Оскуолалар учууталлара үксэ бары – ХИФУ уонна ЯГУ выпускниктара диэн чуолкайдык этиэхпин сөп. Үлэ биэрээччилэр буоларбыт быһыытынан биһиги билиитин хаачыстыбатын көрөбүт уонна үлэ биэрээччигэ имигэс билии, уларыйар дьоҕур уонна толкуй наада. Эһиги үлэлии кэллэххитинэ оскуолаҕыт саҥа тыыны булуо, оччоҕо биһиги бииргэ үлэлэһиэхпит диэн эрэнэбин», – диэтэ миниистир.

Магистр дипломун ылбыт филологическай факультет выпускнига Сардаана Протопопова үнүбэрситиэккэ үөрэх уонна ону таһынан тугунан дьарыктаналларын туһунан кэпсээтэ.

«ППОС пресс-сулууспатыгар үлэлиибин, суруналыыс идэтэ миэнэ буоларын быһыытынан, суруналыыстыка салаатыгар магистратураҕа киирэргэ быһаарыммытым. Миэхэ ХИФУ сайдарбар кыах биэрбитэ, онтон олус үөрэбин – мин биир кэмҥэ үөрэммитим, уопсастыбаннай, волонтерскай үлэнэн уонна науканан дьарыктаммытым. Бу алта сыл устата үнүбэрситиэт салалтата, учууталлар биһигини саҥа саҕалааһыннарга өрүү өйүүллэрэ», – диэн Сардаана Протопопова кэпсээтэ.

Математика уонна информатика институтун выпускнига Ву Ба Шанг үөрэх кэмигэр көхтөөхтүк үөрэнэн, науканан дьарыктанан араас куораттарга уонна дойдуларга сылдьыбытын бэлиэтээтэ.

«Выпускниктарга барыларыгар олох дьоһун кэрдииһин түмүктээтибит уонна саҥаҕа киирэбит диэн этиэхпин баҕарабын. Хас биирдиигит саамай хорсун идиэйэлэрэ уонна бырайыактара олоххо киирэн, кэлэр кэскилгэ дьоллоох билиэт ылыаҕа диэн эрэнэбин», – диэн Ву Ба Шанг түмүктээтэ.