ХИФУ иһинэн үлэлиир анал үөрэтэр-научнай киин хамаандата кыһыл көмүс уонна икки үрүҥ көмүс мэтээллэринэн Yakutia International Science Fair IV-с норуоттар икки ардыларынааҕы оскуолатааҕы научнай конференцияҕа Гран-при үрдүк аатын ылла.
ХИФУ иһинэн үлэлиир анал үөрэтэр-научнай киин дириэктэрэ Милана Федотова этэринэн, оҕолор бары түөрт секцияҕа дакылааттары бэлэмнээбиттэр уонна үс хамаанданан кыттыбыттар – ХИФУ иһинэн үлэлиир анал үөрэтэр-научнай киин, ХИФУ наука коллаборациятын дьиэтэ уонна СӨ Билим аччыгый академията.
«2022-2023 сыллааҕы үөрэх дьыла биһиэхэ олус ситиһиилээхтик түмүктэннэ. Биһиги оҕолорбут 80-тан тахсата бүтүн Россиятааҕы күрэхтэһиилэргэ, 20-чэтэ норуоттар икки ардыларынааҕы куонкурустарга кыайдылар, бириистээх миэстэлэргэ тигистилэр. Быйыл ХИФУ иһинэн үлэлиир анал үөрэтэр-научнай киини 61 оҕо бүтэрдэ, ол иһигэр түөрт үөрэнээччи кыһыл көмүс мэтээли ылла», –диэн Милана Федотова эттэ.
ХИФУ иһинэн үлэлиир анал үөрэтэр-научнай киин үөрэнээччитэ Анастасия Донская университет лицейын хамаандатыттан кыһыл көмүс мэтээли ылбыт. Кини биллиилээх ырыаһыт Лана Дель Рей айар үлэтин туһунан дакылаат бэлэмнээбит. Кыыс ырыанан дьарыктанар уонна ырыаһыт аллюзияны хайдах туһанарын билээри үлэлэрин үөрэппит.
Оттон өссө биир кыһыл көмүс мэтээлинэн лицейы бүтэрбит Марат Петров «Исследование по добавлению углеродного волокна в сверхвысокомолекулярный полиэтилен (СВМПЭ)» диэн дакылааты бэлэмнээбит.
Быйылгы конференцияҕа тэрийээччилэр онлайн уонна офлайн форматтары дьүөрэлээн ыыттылар. Ол курдук, барыта холбоон 106 оҕо кыттыбыт, очнайга – 28 үөрэнээччи, дистанционнайга – 78.
