ХИФУ туризмҥа бүтүн Россиятааҕы оскуола олимпиадатын тэрийсиэҕэ

Хотугулуу-Илиҥҥи федеральнай үнүбэрситиэт туризмҥа уонна сервиска бүтүн Россиятааҕы оскуола олимпиадатын тэрийиигэ ыҥырылынна. Бу туһунан үрдүк үөрэх кыһатын пресс-сулууспата иһитиннэрэр.

«Точка Кипенияҕа ыытыллыбыт Route 14 туризм кейс-турнир түмүгүнэн олимпиаданы тэрийии туһунан этии киирбитэ. Дьокуускай оскуолаларын 9-11 кылаас үөрэнээччилэрэ Амма улууһун туризмын туһунан кэпсиир 120 слайда көмөтүнэн кейсы быһаарбыттара», — диэн иһитиннэриигэ этиллэр.

Кейс-турнирга уопсайа 32 кыттааччы күрэстэстэ. Хотугулуу-Илиҥҥи, Казань федеральнай үнүбэрситиэттэртэн, Туризм уонна олохтоох маркетинг сайдыытын агентствотыттан экспердэр кытыннылар.

Күрэхтэһии сүрүн сыала туризм эйгэтигэр научнай-чинчийэр үлэҕэ үөрэнээччини сыһыарыы, интэриэһи үөскэтии.

Кейс-турнирга оскуола оҕолоро Саха сирин туризмын маркетинговай чинчийиитин кытта билистилэр.