ХИФУ устудьуоннара саахымакка дойду турнирын чөмпүйүөннэрэ буоллулар

Хотугулуу-Илиҥҥи федеральнай үнүбэрситиэт устудьуоннара Бүтүн Россиятааҕы саахымат турнирыгар икки кыһыл көмүс уонна икки боруонса мэтээли ылары ситистилэр. Бу туһунан үөрэх кыһатын пресс-сулууспата иһитиннэрэр.

Устудьуоннар турнирдара балаҕан ыйын 22-29 күннэригэр Липецкэй уобалас Елец куоратыгар ааста.

Кыһыл көмүс мэтээллэри Алена Бурмистрова уонна Айсена Васильева ыллылар, боруонса мэтээллэри — Айтал Местников уонна Николай Захаров. Уопсай хамаанданан ахсааҥҥа ХИФУ хамаандата иккис миэстэҕэ таҕыста.

«ХИФУ сүүмэрдэммит хамаандатын кыттыылаахтара уопуттаах саахыматчыттар. Кинилэр элбэхтэ дьарыктаналлар, араас таһымнаах турнирдарга кытталлар, бэйэлэрин үөрүйэхтэрин сайыннараллар. Ааспыт сылга үнүбэрситиэт хамаандата үһүс миэстэни ылбыта. Быйыл биир үктэлинэн үөһэ таҕыстылар. Үнүбэрситиэккэ саахымат куруһуога баар, тренеринэн Рустам Пахомов үлэлиир», – диэн ХИФУ интеллектуальнай успуорт көрүҥнэрин киинин дириэктэрэ Юрий Никифоров кэпсээтэ.

Бу турнир Россия устудьуоннарын сүүмэрдэммит хамаандатыгар киирэн, норуоттар икки ардыларынааҕы күрэхтэргэ кыттар иһин сүүмэрдиир түһүмэх буолар.

«Биһиги саахыматчыттарбыт — Саха сирин уонна Уһук Илин чөмпүйэнээттэрин, «Moscow Оpen», «Азия оҕолоро» оонньуулар курдук улахан турнирдар кыайыылаахтара уонна призердэрэ буолаллар. Николай Захаров уонна Айтал Местников саахымакка өрөспүүбүлүкэ успуордун маастарыгар хандьыдааттар. Санатар буоллахха, 2019 сыл кулун тутар ыйыгар ХИФУ устудьуоннара түргэн саахымакка норуоттар икки ардыларынааҕы интэриниэт ситиминэн ыытыллар «Кубок ЕАПУ» турнир үрүҥ көмүс мэтээлин хаһаайына буолбуттара», – диэн дириэктэр бэлиэтээтэ.