Ил Дархан Казань оскуолатыгар тахсыбыт быһылаанынан кутурҕанын биллэрдэ

Ил Дархан Айсен Николаев, бүгүн, ыам ыйын 11 күнүгэр, Казань оскуолатыгар ытыалааһыҥҥа тыыннара быстыбыт үөрэнээччилэр уонна учууталлар аймахтарыгар кутурҕанын биллэрдэ.

«Өрөспүүбүлүкэ элбэх омуктаах норуотун аатыттан Казань куоракка тахсыбыт ытыалааһыҥҥа тыыннара быстыбыт оҕолор уонна учууталлар аймахтарыгар дириҥ кутурҕаммын биллэрэбин. Курутуйабыт уонна өлбүттээхтэр аймахтарыгар өйөбүл тыллары этэбит. Эмсэҕэлээбит дьоҥҥо этэҥҥэ буолалларыгар баҕарабыт», — диэн Twitter-гэ суруйда.

Россия бэрэсидьиэнэ Владимир Путин эмсэҕэлээбит оҕолору туһааннаах медицинэ өҥөтүнэн хааччыйарга соруйда. Бу туһунан бэрэсидьиэн пресс-сэкирэтээрэ Дмитрий Песков Новости информационнай ааҕыныстыбатыгар иһитиннэрдэ. Көмө оҥорорго Казань куоракка ыксаллаах быһыы-майгы сөмөлүөтэ медиктэри уонна психологтары илдьэ көтүөҕэ, ону тэҥэ РФ доруобуйа харыстабылын миниистирэ Михаил Мурашко уонна үөрэҕирии миниистирэ Сергей Кравцов.

Владимир Путин Росгвардия дириэктэригэр Виктор Золотовка, Казань куоратыгар тахсыбыт балаһыанньанан, гражданнар туһаныахтарын сөптөөх сэбилэниилэрин туһунан саҥа балаһыанньаны оҥорорго соруйда.

«Бэрэсидьиэн соруга бэлэмнэниэҕэ. Билигин булт тэрилэ буолбатах сорох сэби-сэбиргэли булт тэрилин быһыытынан сокуонунан регистрациялыахха сөп, оттон сорох дойдуларга бу штурмовой сэбилэнии быһыытынан туһаныллар», — диэтэ Дмитрий Песков.

Россия силиэстийэлиир кэмитиэтин Татарстаннааҕы силиэстийэлиир управлениета икки эбэтэр онтон элбэх киһини өлөрүү туһунан холуобунай дьыаланы көбүттэ. Сэбилэммит эр киһи гимназияҕа киирэн саанан ытыалаабыта сабаҕаланар. Билиҥҥи туругунан, хас да киһи өлбүтэ, ону тэҥэ бааһырбыта биллэр, кинилэргэ медицинэ көмөтө оҥоһуллар. Тутуллубут киһи билиннэ — бу 2001 сыллаах төрүөх, олохтоох.