Саха сирин Ил Дархана Айсен Николаев РФ спордун миниистирэ Олег Матыцины кытары мас тардыһыы уонна художественнай гимнастика сайдыытын туһунан дьүүллэстэ.
Ону тэҥэ «Уһук Илин уулуссалара» быыстапкаҕа Саха сирин павильонугар 2024 сылга өрөспүүбүлүкэ киин куоратыгар ыытыллар «Азия оҕолоро» норуоттар икки ардыларынааҕы оонньуулары билиһиннэрдилэр.
Олег Матыцин презентацияны үрдүктүк сыаналаата уонна спортивнай тэрээһини өйүүргэ сүрүн болҕомтотун уурда.
Көрсүһүүгэ Айсен Николаев оонньуларга бэлэмнэнии тиһигин быспакка бара турарын иһитиннэрдэ.
«Тас дойдулартан биһиэхэ делегациялар кэлэ сылдьыбыттара. Күрэхтэһиигэ 25 кэриҥэ дойду кыттара былааннанар», — диэн Ил Дархан эттэ.
СӨ физическэй култуураҕа уонна спорка миниистирэ Леонид Спиридонов павильоҥҥа Саха сиригэр сотору кэминэн мас тардыһыыга Колмар куубага ыытылларын туһунан иһитиннэрдэ. Күрэхтэһиигэ 20-тэн тахса дойдуттан бэрэстэбиитэллэр кыттыахтара диэн миниистир эттэ.
