Ил Дархан: Саха сирэ оҕо төрөөһүнүнэн Россияҕа алта иһигэр киирдэ

Ил Дархан Айсен Николаев «Биир ньыгыл Россия» баартыйа съеһин үһүс түһүмэҕин түмүгүнэн санаатын эттэ. Ол курдук, Доруобуйа сылыгар туһуламмыт миэрэлэр Саха сиригэр оҕо төрөөһүнүн үрдэттилэр.

«Оҕолоох дьиэ кэргэни өйүүргэ туһуламмыт миэрэлэр өрөспүүбүлүкэбитин Уһук Илиҥҥэ бастыҥ, Россияҕа алтыс миэстэҕэ таһаардылар. Бу хайысхаҕа сүрүн сыалбыт диэн, медицина киһиэхэ туһуламмыт буолуохтаахтар. Ол иһин Доруобуйа сыла Доруобуйа уон сылыгар кубулуйда», – диэбит Ил Дархан.

Кини быыбар түмүгүн туһунан эмиэ эттэ.

«»Биир ньыгыл Россия» историятыгар биир саамай ыарахан быыбары ааста. Кэлэр сылларга партия дойдуга балаһыанньатын бигэргэтиэн наада. Үгүс партиец үлэтин тутулун, үлэҕэ сыһыанын уларытыан наада», – диэбит Айсен Николаев.

Санатан эттэххэ, бүгүн, ахсынньы 4 күнүгэр, Москваҕа «Биир ньыгыл Россия» баартыйа съеһин үһүс түһүмэҕэ буола турар. Быыбар түмүгүн быһаарсаллар, баартыйа салайар уорганнарын талаллар уонна кэлэр сылга үлэни торумнууллар. Съезд үһүс түһүмэҕэ партия төрүттэммитэ сүүрбэ сылыгар ананар. Бу иннинээҕи икки съезд сайын буолбута.