Итирик суоппар Хаҥаласка суол саахалын таһаарда

НВК САХА — Хаҥалас улууһугар тахсыбыт суол саахалыгар түөрт киһи эчэйии ылбыт. Бу туһунан Суолга куттал суох буолуутун судаарыстыбаннай инспекцията иһитиннэрдэ.

Саахал балаҕан ыйын 7 күнүгэр «Умнас» суол 69-с килэмиэтиригэр буолбут.
«Хонда Степвагон» массыына суоппара «Дьокуускай – Покровскай» хайысханан айаннаан иһэн утары суолга тахсан, «ГАЗ-3221» массыынаны кытары харсыспыт.

Саахал түмүгэр «ГАЗ» массыына суоппара, «Хонда» массыына суоппара уонна икки олорсон испит пассажир эчэйбиттэр.

«Хонда» массыына суоппара 2017 сылтан ылата массыына ыытар бырааптаах. 2019 сыл устата үстэ суол быраабылатын кэһэн административнай эппиэтинэскэ тардылла сылдьыбыт. Алкотестер көрдөрүүтүнэн  – 0.47 мг/л арыгы иһэн баран сылдьыбыт, медицинскэй туоһулааһынтан аккаастаммыт. «Суоппар итирии туругун быһаарар медицинскэй туоһулааһын ирдэбилин тутуспатаҕын иһин» ыстатыйанан административнай дьыала тэрилиннэ, 30 тыһыынчаҕа тиийэ
ыстараап ананыан уонна 1,5 сылга масыына ыытар бырааба быһыллыан сөп.

Суоппар саахал тахсар кэмигэр оһолтон сэрэтэтэр куру баанан олорбут. Төбөтүн өлөрбүт, уҥа харытын икки уҥуоҕун уонна уҥа өттүгүн уҥуоҕун
тоһуппут. 2-с №-дээх өрөспүүбүлүкэ балыыһатыгар ыыппыттар.

Инники миэстэҕэ олорсон испит пассажир дьахтар айан кэмигэр оһолтон сэрэтэтэр куру баанан олорбут. Кыра эчэйии ылан Покровскай куорат балыыһатыгар ыытыллыбыт.

Иккис олорсон испит пассажир дьахтар оһолтон сэрэтэтэр куру баамматах. Араас улахан эчэйии ылбыт, билиҥҥи кэминэн ыарахан туруктаах Покровскай куорат балыыһатын реанимациялыыр отделениетыгар сытар.

«ГАЗ» массыына суоппара айан кэмигэр оһолтон сэрэтэтэр куру баамматах. Араас эчэйии ылан 2-с №-дээх өрөспүүбүлүкэ балыыһатыгар ыытыллыбыт.

Саахал тахсар кэмигэр таһырдьа сырдык, сөҥүүтэ суох эбит. Суол астфальт бүрүөһүннээх көнө учаастагар буолбут. Бу учаастакка өрөмүөн үлэтэ бара турбут, айан түргэнин хааччахтыыр суол бэлиэлэрэ бааллар эбит.

Дьыала матырыйааллара силиэстийэлиир уорганнарга ыытылыннылар.