Өймөкөөҥҥө үс ойуур баһаара баар

Өймөкөөн улууһугар 28 га иэннээх сиргэ үс ойуур баһаара баара билиннэ. Бу туһунан Россия ыксаллаах быһыыга-майгыга министиэристибэтин өрөспүүбүлүкэтээҕи салаатын пресс-сулууспата иһитиннэрэр.

«Нэһилиэнньэлээх пууннары баһаартан сэрэтэр бары дьаһаллар ылылыннылар. Минерализованнай балаһалар оҥоһулуннулар уонна айылҕа мэһэйдэрэ бааллар. Бары нэһилиэнньэлээх пууннар бааһаарынай сулууспа бөлөхтөрүнэн хабылыннылар. Дьон олоҕор-дьаһаҕар уонна экономика эбийиэктэригэр куттал суоһаабат», — диэн сүрүннүүр управление начальнига Павел Гарин кэпсээтэ.

Өймөкөөн улууһугар баһаардартан сэрэхтээх буолуу ураты эрэһиимэ биллэрилиннэ. Уоту умуруорууга 13 олохтоох киһи, 34 Рослесхоз үлэһитэ уонна аҕыс тиэхиньикэ кыттыыны ылар.

Өрөспүүбүлүкэҕэ айылҕа баһаардарын сэрэтэргэ уопсайа 183 рейдэ ыытылынна, сэттэ боротокуол толорулунна уонна алта административнай быраабы кэһии туһунан уураах таҕыста.