Өймөкөөҥҥө «Тымныы полюһа» марафон ыытыллыаҕа

Тохсунньу 22 күнүгэр Өймөкөөн улууһугар «Тымныы полюһа» үһүс кыһыҥҥы марафон саҕаланыаҕа. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.

Онлайн-регистрацияны 65 кыттааччы ааста. Быйыл кинилэр «Өймөкөөн-Томтор» хайысханан сүүрүөхтэрэ.

«Быйылгы марафон Саха АССР 100 сылыгар уонна “Аляска-Сибиир” трасса 80 сылыгар ананар. Ол иһин тэрээһин үрдүк таһымнаахтык ыытыллыахтаах. Бастатан туран дьон доруобуйатыгар куттал суох буолуутун хааччыйыы ирдэбилин болҕомтоҕо уурабыт», — диэн СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников эттэ.

Марафон спортсменнара саастарынан бөлөхтөргө арахсаллар: 18-39 саастаахтар; 40-49 саастаахтар; 50-59 саастаахтар; 60-69 саастаахтар; 70-тэн саастаахтар. 42 килэмиэтир 195 миэтэрэ уһуҥҥа сүүрүү ыытыллыаҕа. Тэрийээччилэр иһитиннэрэллэринэн, кыттааччылар Өймөкөөнтөн Томторго диэри тиийэллэригэр биэс чаас бэриллэр. Бу бириэмэни баттаспатах кытааччы марафонтан уһуллар.