«Үҥкүүлээ» бырайыак кыайыылааҕынан «Вдохновение» ансаамбыл буолла

Элбэх көрөөччү киэҥ биһирэбилин уонна сэҥээриитин ылбыт. Саха сирин араас муннуктарыттан сылдьар үҥкүү абылаҥар ылларбыт дьоммут-сэргэбит туһугар ыалдьан, сыаналаан, балай да өр кэтээн көрбүт «Үҥкүүлээ» бырайыакпыт бэҕэһээ, ахсынньы 7 күнүгэр түмүктэннэ.

Өрөспүүбүлүкэ бары улуустарыттан 100-кэ сайаапка киирбититтэн, 42 ансаамбыл талыллан кыттыыны ылла. Бары да олус талааннах, дьоҕурдаах дьон. Үлэ уонна дьиэтээҕи түбүк быыһыгар бириэмэ булан үҥкүү үөрэтэн, нэһилиэк, улуус дьонун түмэн, үҥкүүнү таптаан, үҥкүүгэ сүгүрүйэн бырайыакпытын киэргэттилэр.

Түмүк түһүмэххэ алта бастыҥ ансаамбыл: «Дайыы» (Кыргыдай, Бүлүү), «Мичилий» (Салбаҥ, Нам), «Далбар» (Арыылаах, Бүлүү), «Созвездие» (Дьокуускай), «Ситим» (Төҥүлү, Мэҥэ Хаҥалас) уонна «Вдохновение» (Дьокуускай) тиийдэ.

Дьүүллүүр сүбэ быһаарыытынан «Вдохновение» Пенсионнай пуонда үлэһиттэрин ансаамбыла кыайыы өрөгөйүн биллэ уонна 100 000 солкуобай харчынан наҕараадаланна. Оттон куоластааһын түмүгүнэн, Мэҥэ Хаҥалас Төҥүлүтүттэн кэлбит «Ситим» ансаамбыл «Көрөөччү биһирэбилэ» анал аат хаһаайына буолла.

Бырайыак ааптара Михаил Сергеев, туруорааччы режиссер Изабелла Егорова, ситим продюсер Айталы Егорова, ыытааччылар Алена Антонова, Сергей Сидоров, Айхал Рязанский, режиссер Айыы-Сээн Егоров, редактор Карина Семенова, администратордар Дьулус Иванов уонна Катя Иванова бэккэ табыллан үлэлээтилэр.

«Саха» көрдөрөр-иһитиннэрэр хампаанньа «Үҥкүүлээ» бырайыагар кыттыбыт,  тэҥҥэ үҥкүүлэспит, хас субуота ахсын күөх экран нөҥүө көрбүт дьоҥҥо барҕа махтал!

Бырайыак таһаарыыларын НВК «Саха» ютуб ханаалыгар уонна nvk-online.ru сайтка көрүөххэ сөп.