«Саха» национальнай көрдөрөр-иһитиннэрэр хампаанньа ыытар «Үҥкүүлээ» диэн бырайыага бүгүҥҥүттэн, алтынньы 5 күнүттэн, саҕаланна.
Ол курдук Дьокуускайтан «Махтал», «Арыллыы» уонна Уус Алдан улууһуттан «Күбэйэ» ансаамбыллар салгыы түһүмэххэ аастылар.
«Үҥкүүлээ» күрэххэ сүүмэрдиир түһүмэх субуота ахсын киэһэ 19.00 чааска аһаҕас эфиргэ ыытыллар. Көрөөччүлэр 5522 кылгас нүөмэргэ СУЛУС диэн суруйан баран, сөбүлээбит бөлөхтөрүн нүөмэрин ыыталлар, онон саамай элбэх куолаһы ылбыт биир бөлөх салгыы ааһар. Оттон дьүүллүүр сүбэ икки ханнык ансаамбыл салгыы ааһарын быһаарар.
Күрэххэ үҥкүүнү сэҥээрээччилэр ансаамбыллара, биирдиилээн дьон түмсэн эбэтэр тэрилтэ иһинэн тэриллибит бөлөхтөр кытталлар. Ирдэбил быһыытынан, биир бөлөххө улааппыта 10 кыттааччы буолуохтаах, народнай эбэтэр идэтийбит таһымнаах ансаамбыл күрэххэ кыттыбат.
