Лена Афанасьева СӨ доруобуйа харыстабылын миниистирин э.т. ананна

Бүгүн, алтынньы 20 күнүгэр, СӨ доруобуйа харыстабылын миниистирин эбээһинэһин толорооччунан Дьокуускайдааҕы өрөспүүбүлүкэ онкодиспансерын сүрүн бырааһа Лена Афанасьева ананна.

Бу туһунан бэйэтин Telegram-ханаалыгар Ил Дархан Айсен Николаев иһитиннэрдэ.

М.К. Аммосов аатынан Саха судаарыстыбаннай үнүбэрсиэтин «Лечебное дело» салаатын, «Якуталмаз» ПНО медико-санитарнай чааһын гинекологияҕа уонна акушерствоҕа интернатуратын бүтэрбитэ.

Ону тэҥэ, Россия Доруобуйа харыстабылын министиэристибэтин «Российская медицинская академия непрерывного профессионального образования» Эбии үөрэхтээһини сайыннарыы институтугар «онкология» исписээлнэһин клиническэй ординатуратын бүтэрбитэ.

Лена Афанасьева үлэтин 1992 сыллаахха «Якуталмаз» ПНО сүрүн медико-санитарнай чааһыгар саҕалаабыта, 1993 сыллаахха Дьокуускайдааҕы өрөспүүбүлүкэ онкологическай диспансерын онколог-гинеколога буолбута.

1994 -1996 сылларга Россия медицина академиятын диплом кэнниттэн үөрэх клиническэй ординатора этэ.

1996 — 2000 сылларга — Дьокуускайдааҕы өрөпүүбүлүкэ онкологическай диспансерын гинекология салаатын акушер бырааһа, хирург, оттон 2000-2009 сылларга отделение салайааччытынан үлэлээбитэ.

2009 сыллаахха Лена Афанасьева Дьокуускайдааҕы доруобуйа харыстабылын управлениетын тэрийэр-методическай үлэтигэр начальник солбуйааччытынан анаммыта, 2013 с. — управление салайааччытынан. 2017 сыллаахха Дьокуускайдааҕы өрөспүүбүлүкэ онкологическай диспансерын сүрүн бырааһынан анаммыта.

Медицина наукаларын уонна доруобуйа харыстабылын тэрийии эйгэтигэр П.А. Петров аатынан судаарыстыбаннай бириэмийэ лауреата, СӨ доруобуйа харыстабылын туйгуна, СӨ доруобуйа харыстабылын үтүөлээх үлэһитэ, «СӨ онколог быраастарын ассоцияцията» уопсастыбаннай тэрилтэ, «Россия ийэлэрэ» бүтүн россиятааҕы уопсастыбаннай тэрилтэ Саха сиринээҕи салаатын, «Саха сирин учуонай дьахталлара» Лига, «Биир ньыгыл Россия» баартыйа чилиэнэ.

Санатан эттэххэ, Елена Борисова СӨ доруобуйа харыстабылын миниистирин дуоһунаһыттан уурайбыта.