Маай бырааһынньыга уонна Судаарыстыбаннас күнэ онлайн бэлиэтэниэҕэ

Судаарыстыбаннас күнэ уонна ыам ыйын бэлиэ күннэрэ сүрүннээн онлайн ааһыахтара. Бу туһунан Ил Дархан уонна бырабыыталыстыба дьаһалтатын пресс-сулууспата иһитиннэрэр.

«Муус устар 27 күнүн уонна ыам ыйын 1 күнүн бэлиэтээһин дистанционнайдык ыытыллыаҕа. Пасханы бырааһынньыктааһын боппуруоһа быһаарыллыаҕа», — диэн иһитиннэриигэ этиллэр.

Бүтэһик күннэргэ коронавируһунан ыалдьар дьон ахсаана элбээтэ. Онуоха 65 сааһын ааспыт дьон ордук ыалдьар. Ыарахан ыарыһахтар эмиэ бааллар. Онон сибээстээн Ил Дархан Айсен Николаев оройуон баһылыктарыгар вакциналааһыны уонна хааччахтыыр миэрэни күүһүрдэргэ соруйда.