2022 сылга Мастаахтан Кыһыл Сыырга диэри гаас турбатын тутууга федеральнай үбүлээһин кээмэйэ 2,8 млрд солкуобайга тэҥнэһиэҕэ. Бу туһунан СӨ бырабыыталыстыбатын уонна дьаһалтатын пресс-сулууспата иһитиннэрэр.
Тустаах быһаарыыны Россия үбүн министиэристибэтэ ылла.
«Нэһилиэнньэни уонна өрөспүүбүлүкэ тэрилтэлэрин быыстала суох гааһынан хааччыйыыга Мастаахтан Кыһыл Сыыр бөһүөлэгэр диэри сүрүн гаас турбатын тутуутун ситэрии тыын боппуруос буолар», — диэн иһитиннэриигэ этиллэр.
Саха сирин киин гаастааһын систиэмэтэ Орто Бүлүү гаас хостуур сириттэн Дьокуускайга диэри, ол иһигэр 84 килэмиэтир усталаах икки утахтаах Кыһыл Сыыр бөһүөлэгиттэн Мастаах сэлиэнньэтигэр диэри , 382 килэмиэтир усталаах Мастаахтан Дьокуускайга диэри үс утахтаах биир кэлим комплекстан турар.
