«Медиашкола: Уһук Илиҥҥи репортер» бырайыагынан үөрэниигэ сайаапкалары ыам ыйын 22-гэр диэри ылыахтара

«Медиашкола: Уһук Илиҥҥи репортер» бырайыагынан үөрэниигэ суруналыыстартан, блогердартан уонна PR-исписэлиистэртэн сайаапкалары ылыы ыам ыйын 22 күнүгэр диэри уһатылынна. Бу туһунан тэрийэр кэмитиэт иһитиннэрэр.

Бырайыак саҥа сезонун кыттааччылара Хабаровскай куоракка көрсүөхтэрэ. «ProДФО – Хабаровский край» форум чэрчитинэн, сайаапкаларын биэрбиттэри кытта билсиһэр көрсүһүү буолуоҕа.

«Абитуриеннар хамаандаларыгар киирэр сыалтан dfopress.ru сайтка киирэн форма толороллоро, 2020-2021 сылларга тахсыбыт үс бастыҥ матырыйаалларын ссылкатын, социальнай ситими ааҕан туран, ыыталлара наада. Экспертнэй хамыыһыйа кыттааччылар кыахтарын сыаналыаҕа уонна үөрэххэ ылыы туһунан быһаарыы ылыаҕа», — диэн бырайыак салайааччыта Алексей Бабков иһитиннэрдэ.

Ону тэҥэ, «Медиашкола» үлэтин иһинэн, биллэр федеральнай көрдөрөр-иһитиннэрэр хампаанньалар уонна ааҕыныстыбалар экспертэрэ үөрэтэр лециялар уонна семинардар тиһиктэрин ыытыахтара.

Ол курдук, «Новая журналистика и особенности построения заголовка» маастар-кылаас чэрчитинэн, ТАСС региональнай сонуннарын редакциятын салайааччыта Андрей Цицинов кыттааччыларга ТОП-сонуннарга киирэргэ туһаныллар албастары билиһиннэриэҕэ, оттон телевидение уонна радио ыытааччыта, ВШГУ РАНХиГС аныгы коммуникациялар кииннэрин эксперэ Алексей Фролов «Техника публичных выступлений в СМИ» сүрэхтиэҕэ, ону таһынан, медиа уобалаһыгар быраап боппуруостарыгар адвокат Галина Антонец медиа туһунан сокуоҥҥа тиһэх уларыйыылары сырдатыаҕа.

«Медиашкола» — диэн Уһук Илин идэлээх суруналыыстар, блогердар уонна пресс-сулууспалар үлэһиттэрин уопсастыбаларын идэлэрин үрдэтэр, уокурук таһымыгар бастакы экспериментальнай бырайыак. Бырайыак 2018 сыл олунньутуттан РФ бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлин аппараатын көмөтүнэн социальнай көҕүлээһини сайыннарыы пуондата олоххо киллэрэр.

Бырайыак олоххо киириэҕиттэн 170 киһи үөрэннэ, аҕыс очнай сессия ыытылынна, онно Уһук Илинтэн уопсайа 600-тэн тахса киһи кытынна. Үөрэтиини уонна кэпсэтиини тэрийиигэ көрдөрөр-иһитиннэрэр хампаанньа, SMM, медиа быраабын, кэпсэтии уйулҕатын, информационнай күүрээн, хаартыскаҕа түһэрии уонна да атын эйгэттэн 100-тэн тахса эксперт үлэлэстэ.