«Миигин кытта үҥкүүлээ» киинэни Санкт-Петербурга көрдөрүөхтэрэ

Режиссер Никандр Фёдоров «Миигин кытта үҥкүүлээ» киинэтэ муус устар 24 күнүгэр Санкт-Петербург куоракка сахалыы тылынан нууччалыы субтитрдаах көстүөҕэ.

Сеанс «Великан Парк» киноцентрга олохтоох бириэмэнэн 19:00 чаастан саҕаланар.

Киинэҕэ Ньургунаах Сайсары оҕотук ыраас сыһыаннара кэпсэнэр. Ньургун оҕо эрдэҕиттэн Сайсарыны сөбүлүү көрөр, ол эрээри саамай тоҕоостоох түгэҥҥэ хорсун санаата уонна сөптөөх тыллара тиийбэт. Тапталын дьылы-кэми уҥуордаан бүөбэйдии сылдьан, Сайсары кими да күүппэтэх түгэнигэр Ньургун аттыгар баар буолар.

Билиэттэр киинэ тыйаатырын сайтыгар, ону тэҥэ «КиноПоиск» уонна «Афиша» сайтарга атыыланаллар.