Мииринэйгэ 130-тан тахса киһини хаарбах туруктаах дьиэлэртэн көһөрүөхтэрэ

2019 сылга Мииринэй оройуонугар өрөспүүбүлүкэ хаарбах туруктаах дьиэттэн көһөрүү бырагырааматын чэрчитинэн 131 олохтоохтоҕу көһөрүөхтэрэ. Бу туһунан улуус дьаһалтатын пресс-сулууспата иһитиннэрэр.

«2019 сылга бырагыраама чэрчитинэн 2,5 тыһыынча кв миэтэрэ иэннээх хаарбах туруктаах тутуулары көтүрэн, 57 дьиэттэн 131 киһини көһөрүү былааннанар. Сорох дьон кинилэргэ ананан ылыллыбыт дьиэлэргэ көһөллөр, сорохтор харчынан төлөбүрү таллылар», – диэн этиллэр.

Мииринэй оройуонугар бырагыраама чэрчитинэн уопсайа 1182 киһини көһөрүү былааннанар. Олортон Мииринэй куоратыгар — 15 дьиэттэн 473 киһини, Айхал бөһүөлэгэр 11 дьиэттэн 321 киһини, Чернышевскай бөһүөлэгэр — 6 дьиэттэн 87 киһини, Арыылаах сэлиэнньэтигэр — 8 дьиэттэн 121 киһини, Алмазнай бөһүөлэгэр — 13 дьиэттэн 121 киһини уонна Светлэй бөһүөлэгэр 4 дьиэттэн 59 киһини көһөрүөхтэрэ.

Бырагыраама түһүмэхтэринэн ыытыллар. 2019 сыл ыам ыйыгар СӨ тутуу министиэристибэтэ, олорор дьиэ тутуутун дириэксийэтэ уонна улуус дьаһалтата баттаспыт сөбүлэһиилэрин чэрчитинэн быйыл Айхал, Чернышевскай уонна Светлэй бөһүөлэктэрин, ону тэҥэ Мииринэй куоратын хаарбах туруктаах дьиэлэрин көһөрүү ыытыллар.

Алтынньы 1 күнүн көрдөрүүтүнэн, Мииринэй куоратын Ойуунускай аатынан уулуссатын 24 №-дээх дьиэтин тоҕус олохтооҕо түөрт саҥа кыбартыыраҕа көһөрүллүбүт, атын кыбартыыралар олохтоохторун көһөрүү үлэтэ ыытыллар.

Айхал бөһүөлэгин Полярнай уулуссатын 20 №-дээх уонна Геологов уулуссатын 9 №-дээх дьиэлэрин олохтоохторугар алта кыбартыыра ылыллан докумуон бэлэмнэнэ сылдьар. Ону тэҥэ уон ыал харчынан төлөбүр ылыытын докумуоннара сөбүлэһиини ааһар.

Чернышевскай бөһүөлэгэр үс кыбартыыра ылыллан докумуоннара оҥоһулла сылдьар, ону тэҥэ икки сөбүлэһии түһэрсиллэрэ бэлэмнэнэр.

Светлэй бөһүөлэгин Вороля уулуссатын 13 №-дээх уоннаТаежнай уулуссатын 6 №дээх дьиэлэрин 12 кыбартыыраларын олохтоохторо харчынан төлөбүрү талан, докумуоннара баттаннылар. Икки кыбартыыра көнө сөбүлэһии түһэрсэргэ бэлэмнэнэр.