Миирнэйгэ «Алмаастаах куораттар инникилэрэ» форум буолан ааста

Муус устар 15 күнүгэр Миирнэйгэ «Алмаастаах куораттар инникилэрэ» социальнай реформаларга аналлаах форум буолан ааста. Бу туһунан АЛРОСА хампаанньа пресс-сулууспата иһитиннэрэр.

Тэрээһиҥҥэ Ил Дархан Айсен Николаев, АЛРОСА генеральнай дириэктэрэ Сергей Иванов уонна Миирнэй оройуонун салайааччыта Ришат Юзмухаметов кыттыыны ыллылар. Форумҥа уопсайа 500 кэриҥэ делегат кытынна — АЛРОСА үлэһиттэрэ, Миирнэй, Удачнай, Айхал олохтоохторо.

Сотору оройуоҥҥа доруобуйа харыстабылын тиһигин реформата саҕаланыаҕа, чугастааҕы сылларга миллиардтан тахса солкуобайы көрүөхтэрэ. 2021 сылга алмааһы хостуур хампаанньа ити сыалга 204 мөлүйүөн солкуобайы тыырыаҕа.

Доруобуйа харыстабылын саҥардыы бырагырааматынан Миирнэй оройуоннааҕы киин балыыһатыгар – улахан дьон поликлиникатыгар, Алмазнай амбулаториятыгар, Светлинскэй балыыһатыгар, дьахтар консультациятыгар уонна төрүүр отделениеҕа, Таас Үрэх, Сүлдьүкээр фельдшерскэй-акушерскай пууннарыгар хапытаалынай өрөмүөн ыытыллыаҕа. Ону тэҥэ, Айхалга уонна Удачнайга поликлиникалары кытта эмтиир куорпустарга саҥардыы үлэтэ барыаҕа.

Үрдүк технологиялаах медицинэ көмөтүн оҥорор травматологическай киин аһыллыаҕа. Өрөспүүбүлүкэ судаарыстыбаннай, оройуон уонна АЛРОСА хампаанньа бүддьүөтүттэн Миирнэйдээҕи киин, Айхаллааҕы балыыһалар подразделениеларын медооборудованиенан хааччыйыахтара, муниципалитеттар доруобуйа харыстабылыгар массыыналары атыылаһыахтара.

«АЛРОСА хампаанньа Миирнэй оройуонун эрэ буолбакка, өрөспүүбүлүкэ үрдүнэн социальнай боппуруостары быһаарыыга уонна социальнай эйгэҕэ инвестициялааһыҥҥа кыттыһара үөрдэр», – диэн хампаанньа көҕүлээһинин Айсен Николаев сыаналаата.

Ону таһынан, 2012 сылтан АЛРОСА Саха сирин бырабыыталыстыбатын кытта сөбүлэһиинэн эргэ уонна хаарбах дьиэлэри көтүрүүнү үбүлүүр. Уопсайа, кэнники тоҕус сылга 69 дьиэни көһөрөн, тыһыынчаттан тахса квартираны тарҕатан, тоҕус элбэх квартиралаах дьиэни туттулар. 2023 сылга диэри өссө 12 дьиэни көтүрэн 238 квартираны түҥэтэргэ былаанныыллар, хампаанньа бу сыалга 780 мөлүйүөн солкуобайдаах үлэни ыытар.

Миирнэй оройуонугар чугастааҕы сылларга хас да улахан култуурнай уонна спортивнай эбийиэктэр тутуллуохтара. Ол курдук, 2022 сылга Миирнэйгэ «Оҕо дыбарыаһа» эбии үөрэхтээһин киинин тутуутугар АЛРОСА 230 мөлүйүөн солкуобайы көрүөҕэ.