Бүгүҥҥү күн көрдөрүүтүнэн мобильнай биригээдэлэр Арктика түөрт улууһугар үлэлииллэр – Аллайыахаҕа, Булуҥҥа, Муомаҕа уонна Усуйаанаҕа.
«Усуйаана уонна Аллайыаха улуустар Оленегорскай, Нычалаах уонна Сайылык нэһилиэктэрин дьонун-сэргэтин көрдүлэр, эмтээтилэр. Аны “Уус Куйга – Казачье” хайысханан бараллар. Оҕолор уонна улахан дьон бары көрдөрөр кыахтаахтар. Диспансерга учуокка сылдьар дьоҥҥо улахан болҕомто ууруллар», — диэн СӨ доруобуйа харыстабылын өрөспүүбүлүкэтээҕи киинин кылаабынай бырааһа Алена Никитина эттэ.
Ол курдук, былааҥҥа киирэн турар нэһилиэктэр: Сииктээх, Буор Сыһыы, Чуумпу Кытыл уонна Күһүүр. Сэтинньи 22 күнүгэр Анаабыр улууһун Үрүҥ Хайа нэһилиэгэр диспансерга учуокка турар дьону былаанынан көрүү саҕаланар.
Быраастар мобильнай биригээдэлэригэр терапевт, эндокринолог, кардиолог, акушер-гинеколог, невролог, ультразвуковой диагностика бырааһа, оториноларинголог, офтальмолог, педиатр уонна орто медицинскэй персонал курдук үлэһиттэр киирдилэр.
Кинилэр медицинскэй анал көмөнү оҥороллор, анализтары ылаллар, электрокардиограммаҕа, ис уорганнары УЗИ-га түһэрэллэр.
Арктика ыраах сытар нэһилиэктэригэр бөртөлүөтүнэн, вездеходунан, «Буран» снегоходунан кытта тиийэллэр.
