Москва куоракка ыытыллыбыт бүтүн Россиятааҕы турнирга эдэр үҥкүүһүттэр кыайдылар

Сыллата ыытыллар «Московия-2021» үгэскэ кубулуйбут турнирыгар өрөспүүбүлүкэ киин куоратын эдэр үҥкүүһүттэрэ Арылхан Данилов уонна Миласлава Мазанова кыайыыны ситистилэр. Бу туһунан «Реверанс» спортивнай үҥкүү кулуубун пресс-сулууспата иһитиннэрэр.

Күрэхтэһии ыам ыйын 8-9 күннэригэр Москва куоракка буолан ааста. Бастакы күн түмүгүнэн, европейскай бырагыраама D-кылааһын «Дети 2+1» бөлөҕөр боруонсаны ылбыттара, онтон ыам ыйын 9 күнүгэр — аҕыс үҥкүүнү толорон, двоеборье бырагыраамаҕа кыһыл көмүһү.

«Бу «Реверанс» спортивнай үҥкүү кулуубун тренердэрин уонна эдэр спортсменнарын дьаныардаах үлэлэрин түмүгэ буолар. Үрдүк таһымнаах күрэхтэһиилэргэ оҕолорун кытыннарар наадатын өйдөөн, айаннарын төлөөн өйүүллэригэр эдэр спорсменнар төрөппүттэригэр махтаныахпын баҕарабын. Биллэн туран, бу оҕолорго улахан турнирнай уопут буолар», — диэтэ үрдүкү тренер Нелли Лилло.

Кини бэлиэтииринэн, Арылхан Данилов уонна Миласлава Мазанова турнирга 5,7 очкону ыллылар, бу кинилэр D-кылаастан С кылааска көһөллөрүгэр көмөлөһүөҕэ.