Муома баһылыгын болдьох иннинэ тохсунньу 30 күнүгэр талыахтара

Муома улууһун саҥа баһылыгын 2022 сыл тохсунньу бүтүүтэ талыахтара. Бу туһунан СӨ киин быбардыыр хамыыһыйатын пресс-сулууспата иһитиннэрэр.

Быһаарыыны ахсынньы 1 күнүгэр улуустааҕы дьокутааттар Сэбиэттэрэ ылбыта.

«Муниципальнай тэриллии баһылыгын болдьоҕун иннинэ талыы 2022 сыл тохсунньу 30 күнүгэр буолуоҕа», — диэн иһитиннэриигэ этиллэр.

Санатан эттэххэ, бу иннинэ баһылыктаан олорбут Иван Павлов балаҕан ыйыгар үлэтинэн айаҥҥа сылдьан күн сириттэн барбыта.