Н.Н. Тарскай кэриэһигэр көҥүл тустуу чемпионатыгар Мэҥэ Хаҥалас хамаандата бастаата

Николай Тарскай кэриэһигэр көҥүл тустууга өрөспүүбүлүкэ чемпионатыгар Мэҥэ Хаҥалас улууһун хамаандата кыайыылааҕынан таҕыста. Бу туһунан СӨ спорка уонна физкультураҕа министиэристибэтин пресс-сулууспата иһитиннэрэр.

Чемпионакка уопсайа 29 хамаандаттан 293 спортсмен кытынна. Мэҥэ Хаҥалас сүүмэрдиир хамаандата бастакытын кубогы ылла. Иккис миэстэ — Чурапчы, үһүс миэстэ — Сунтаар.

57 киилэҕэ диэри ыйааһыҥҥа 17 саастаах Лев Павлов эдэрдэргэ Россия бастыыр иһин күрэхтэһиитигэр призерун Петр Копыловы 7:1 ахсаанынан кыайда.

61 киилэҕэ диэри ыйааһыҥҥа Петр Константинов бастаата. Түмүктүүр киирсиигэ Дьулустан Федотовы түөрт бааллаах быраҕыы кэнниттэн кыайыылааҕынан таҕыста.

65 киилэҕэ диэри ыйааһыҥҥа Эдуард Григорьев Семен Владимировы 15:4 ахсаанынан кыайда. Эдуардка сахалартан маҥнайгынан көҥүл тустууга ССРС уолаттарын кыайыылааҕа Вячеслав Карпов аатынан 30 тыһ. солк. суумалаах анал бирииһи туттардылар.

Финалга 74 киилэҕэ диэри ыйааһыҥҥа Виктор Рассадин Станислав Свинобоевы кыайда — 7:1.

Түөрт сыллаах тохтобул кэннэ Иннокентий Иннокентьев 92 киилэҕэ диэри ыйааһыҥҥа Игорь Софронеевы 8:1 ахсаанынан кыайан бастаата.

70 киилэҕэ диэри ыйааһыҥҥа Айсен Потапов бастаата, 79 киилэҕэ — Константин Власов, 86 киилэҕэ — Герман Устинов, 97 киилэҕэ — Нюргун Сергин уонна 125 киилэҕэ — Никита Хабаров.

Бу күрэхтэһии түмүгүнэн олунньуга Дьокуускайга ыытыллар көҥүл тустууга Уһук Илин чемпионатыгар киирсэр өрөспүүбүлүкэ хамаандата тахсыаҕа.