Сүөһү аһылыгын бэлэмнээһиҥҥэ биир саамай тутаах үлэ – оттооһун үмүрүйэн эрдэҕинэ бурдук хомуура саҕаланна.
Ньурбатааҕы сүөһү аһын-үөлүн бэлэмниир тэрилтэ өссө нэдиэлэ анараатыгар хомууру саҕалаабыта, ол эрээри хас да күннээх ардах атахтаан хомуур тэтимин ылбыта икки-үс эрэ хонно. Тэрилтэ ааспыт саас 300 га иэннээх сиргэ эбиэс ыспыта, маны таһынан 2020 сылга ыспыт элбэх сыллаах отун хомуйар.
«Бурдук үүнүүүтэ быйыл ардах суох буолан үчүгэй, хомуйарбыт эрэ хаалла. Үлэҕэ икки комбайн, үс тыраахтар кыттыаҕа», – диэн «Ньурбатааҕы сүөһү аһылыгын хампаанньата» тэрилтэ генеральнай дириэктэрин солбуйааччы Мария Кириллина эттэ.
Сааскы ыһыыга буоллун, күһүнүн хомуурга буоллун Арктикатааҕы агротехнологическай университет устудьуоннара иккис сылларын Ньурба улууһугар кэлэн практикаларын ааһаллар. Бу да сырыыга устудьуоннар университетка ылбыт билиилэрин үлэнэн бигэргэтэллэр.
«Мин манна иккис сылбын үлэлии сылдьабын. Ааспыт сылга олордооһуҥҥа үлэлээбитим. Эбиэһи, элбэх сыллаах оту хомуйабыт. Манна кэлэммит биһиги бэйэбит идэбитинэн үлэлиирбит курдук уопут ылабыт. Араас оборуданиены, тиэхиньикэни кытары билсэбит», – диэн Арктикатааҕы агротехнологическай университет устудьуона Семен Николаев кэпсээтэ.
Күн-дьыл туран биэрдэр эрэ тэрилтэ бурдугун балаҕан ыйын тиһэх күннэригэр диэри хомуйан бүтэрэр былааннаах. Ааспыт сайын өлгөм үүнүүлээх буолан тэрилтэ былаанын лаппа толорон иһэр. Онон үлэһиттэр үөрүүлэрэ үгүс.
