Олоҥхо Ыһыаҕын кыттааччылара COVID-19 утары быһыы ылбыт буолуохтаахтар

Быйыл бэс ыйын 20-21 күннэригэр Өлүөхүмэҕэ ыытыллар Олоҥхо Ыһыаҕар кыттыыны ылар айар коллективтар, маассабай тэрээһиннэр кыттааччылара булгуччу COVID-19 инфекциятын утары быһыы ылбыт буолуохтаахтар. Бу туһунан Өлүөхүмэ улууһун баһылыга Николай Харбин иһитиннэрдэ.

«Билиҥҥи балаһыанньаны учуоттаан, ыһыах күүһүрбүт ирдэбиллэринэн ыытыллыаҕа: массабай тэрээһиннэр кыттыылаахтара уонна делегациялар бэрэстэбиитэллэрэ бары булгуччу коронавирус утары быһыыны ылбыт буолуохтаахтар. Билигин биир тыһыынча кэриҥэ киһи тэрээһиннэргэ кыттарга бэлэмнэнэ сылдьар. Быһыы ылбатах дьон кыттыыны ылбаттар», — диэн эттэ.

Онуоха, бырааһынньык ыытыллар быһыытын туһунан тиһэх быһаарыы эпидемиологическай балаһыанньаттан көрөн ылыллыаҕа. Ол эрээри бэлэмнэнии үлэ эрэһииминэн салҕанар.

«Балаһыанньа быстала суох кэтэнэр, онон олохтоохторго куттал суох буолуутун хааччыйар туһугар бырааһынньык формата хаттаан көрүллүөн сөп. Санитарнай ирдэбиллэри тутуһууга улахан болҕомто уурулуоҕа диэн этиэхпин сөп: эбийиэктэри дезинфекциялааһын, бэйэни харыстанар сириэстибэлэри туһаныы, бэрчээккэлээх уонна мааскалаах сылдьыы, социальнай арыты тутуһуу. Барыта ол кэмнээҕи быһыыттан-майгыттан тутулуктаныаҕа, ол эрээри ылыллар миэрэлэр ирдэбиллэрэ үрдүк буолуоҕа», — диэн Николай Харбин чопчулаата.

Тэрийэр хамыыһыйа бэрэссэдэтэлэ бигэргэппит бырагырааматынан, бэс ыйын 19-20 күннэригэр кинигэ сүрэхтэниитэ, араас куонкурустар, саха таҥаһын көрдөрүү, киинэ бэстибээлэ, тыыннаах доҕуһуоллаах кэнсиэр буолуохтара.

Олоҥхо Ыһыаҕын аһыллыыта бэс ыйын 20 күнүгэр 11.00 чаастан саҕаланар. Бу күн өрөспүүбүлүкэ таһымнаах олоҥхоһуттар, хомусчуттар, саха быһаҕын, батыйаны, хомуһу, үгэс буолбут оҕу, сахалыы киэргэллэри оҥоруу уонна таҥаһы тигии күрэхтэрэ ыытыллыахтара.

Ону таһынан, икки күн устата мас тардыһыыга, төрүт көрүҥнэргэ, ыстаҥаҕа, остуол оонньууларыгар, оҕунан ытыыга өрөспүүбүлүкэтээҕи күрэхтэр уонна ат сүүрдүүтэ ааһыахтара.