ОРВИ-нан ыалдьыы эпидемиологическай боруогу 15 кэриҥэ %-нан куоһарда

Өрөспүүбүлүкэҕэ ОРВИ-нан ыалдьыы эпидемиологическай боруогу 14,8 %-нан куоһарда. Бу туһунан Роспотребнадзор управлениетын пресс-сулууспата иһитиннэрэр.

Муус устар 26-тан ыам ыйын 2 күнүгэр диэри респираторнай вируснай инпиэксийэнэн ыалдьыы 7 715 түбэлтэтэ бэлиэтэннэ. Ыалдьыбыт дьон 73 %-на оҕолор.

«Ыалдьыы көрдөрүүтэ эпидемиологическай боруогу 14,8 %-нан куоһарда. Саастарынан маннык бөлөхтөргө көрдөрүү ордук бэлиэтэнэр: 0-2 саастаахтарга — 1,3 %-нан, 15-тэн үөһээ — 59,8 %-нан», — диэн иһитиннэриигэ этиллэр.

Лаборатория кэтээн көрүүтүн дааннайынан, өрөспүүбүлүкэҕэ маннык вирустар бааллара бэлиэтэнэр — парагрипп, аденовирустар, RC-вирустар, риновирустар, бокавирустар, метапневмовирустар.