Оскуолаҕа үөрэх кэмигэр оҕо суотабай төлөпүөнү илдьэ сылдьара бобулунна

Роспотребнадзор уонна Россиятааҕы үөрэх надзорун көҕүлээһиннэринэн балаҕан ыйын 1 күнүттэн оскуолаларга үөрэх кэмигэр оҕо суотабай төлөпүөнү илдьэ сылдьара бобуллан турар.

Уус Алдан улууһугар маннык үлэ бастаан төрөппүт мунньаҕыттан саҕаламмыта. Билигин үөрэх салалтатын сүбэтинэн тустаах бары тэрилтэлэргэ барыларыгар хааччахтыыр үлэ барар.

Мобильнай төлөпүөнү оскуола иһигэр, үөрэх кэмигэр туттары хааччахтааһыны ааспыт сылтан Мүрү 1 №-дээх орто оскуолатын коллектива ылынан, оҕолор билигин кыралыын-улаханныын төлөпүөҥҥэ аралдьыйбакка, болҕомтолорун үөрэххэ эрэ туһаайаллар. Оннооҕор иккис «Б» кылаас үөрэнээччилэрэ төлөпүөнү олох даҕаны аҕалбаттар. Ону төрөппүттэртэн уонна оҕолортон күүскэ ирдииллэр.

«Уруокпут олус чуумпутук барар диэххэ сөп. Оҕолор аралдьыйбаттар», — диир алын кылаас учуутала Евдокия Пермякова.

Оттон улахан кылаас үөрэнээччилэрэ уруок саҕаланна да, төлөпүөннэрин ханна ууралларын лоп курдук билэллэр. Сэттис «А» кылаас үөрэнээччилэрэ сарсыарда, уруок саҕаланыан иннинэ, анал хоруопкаҕа төлөпүөннэрин уган кэбиһэллэр. Сынньанар кэмнэригэр, наадалаах буоллахтарына, ылан кэпсэтэллэр.

Кырдьык, маннык дьаһаныы түмүгэр оҕо уруокка кыттара үксүүрэ, билиитэ кэҥиирэ, доруобуйата да тупсара саарбахтаммат. Ону үөрэнээччилэр да өйүүллэр.

Оскуола иһигэр 60-ча көмпүүтэргэ оҕо араас куһаҕан сайтарга киирбэтин курдук блокиратордар тураллар. Итиэннэ көрүдүөрдэргэ эмиэ оҥоһуллуохтаах. Бу үлэни борокуратуура, быйылгыттан Роспотребнадзор күүскэ хонтуруоллуур, ирдиир буолла.

Улууска 35 үөрэх тэрилтэтэ баар буоллаҕына, үгүс оскуолаҕа маннык хааччахтааһын 2018 сылтан, сорох оскуолаларга локальнай аакталар, төрөппүт уопсай мунньаҕын быһаарыытынан ылыныллан тураллар.

Ол эрээри аныгы кэмҥэ бопсор-хаайсар олорчу кыайтарбат эрээри, сыыйа оҕо доруобуйатын, инникитин туһугар ылыныллыбыт үлэ ситиһиилээх буоларыгар эрэниллэр.