Оскуола өрөмүөнүгэр уонна хааччыйыыга 2,8 млрд солкуобайтан тахса сууманы ыытыахтара

2022-2023 сылларга өрөспүүбүлүкэҕэ оскуола хапытаалынай өрөмүөнүгэр уонна аныгы оборудованиенан хааччыйыыга 2,8 миллиард солк. тахса суумалаах субсидияны ыытыахтара. 

Дойду 80 регионнарыгар ити сыалга барыта холбоон 91 миллиард солкуобайы ыытыахтара.

Тустаах дьаһалга дойду премьера Михаил Мишустин илии баттаата.

«Биһиги оҕолорбут аныгы, үчүгэй усулуобуйаҕа үөрэниэхтээхтэр. Ылыллыбыт быһаарыылар үөрэххэ тупсаҕай усулуобуйаны тэрийэргэ көмөлөһүөхтэрэ», – диэн Мишустин эттэ.

Өрөмүөн буолуон инниттэн төрөппүт кэмитиэттэрин кытыннарар уонна үөрэнээчилэр баҕа санааларын истэр улахан суолталааҕын премьер-министр бэлиэтээтэ.

«Россия бэрэсидьиэнэ Владимир Путин сэтинньи 10 күнүгэр бырабыыталыстыбаны кытта сүбэ мунньаҕар бу боппуруоска болҕомтолоохтук сыһыаннаһаргытыгар ыҥырбыта», – диэтэ Михаил Мишустин.

Ол курдук, 2022 сылга Саха сиригэр 2,5 миллиард тахса солкуобай, оттон 2023 сылга 357 мөлүйүөн солкуобай көрүллүөҕэ. Үлэ «Үөрэҕирии сайдыыта» судаарыстыбаннай бырагыраама чэрчитинэн барар.