Пандемия кэмигэр эмсэҕэлээбит урбаанньыттар нолуоктарын аччатыахтара

Өрөспүүбүлүкэҕэ 2022 сылга коронавирус ыарыыта турбут кэмигэр ордук эмсэҕэлээбит салаалаах урбаанньыттар нолуоктарын төлөбүрүн аччатыахтара. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Эмсэҕэлээбит салаалар испииһэктэрин Россия бырабыыталыстыбатын уурааҕынан бигэргэппиттэрэ.

СӨ экономика миниистирэ Майя Данилова чопчулаабытынан, испииһэккэ киһи олоҕор-дьаһаҕар, тырааныспарга, туристическай өҥөнү оҥорор, уопсастыбаннай аһы-үөлү тэрийиинэн, гостиница урбаанынан, ас-үөл атыытынан дьарыктанар тэрилтэлэр киирдилэр.

««Дохуоттаах» эбийиэктээх нолуогу төлөөччүлэргэ ороскуот суотугар, нолуок ыстаапката 10 %-тан 7 %-ҥа диэри намтыаҕа, оттон «дохуоттаах» эбийиэктээх уонна Дьокуускай, Миирнэй, Нерюнгри, Алдан уонна Ленскэй оройуоннарыгар үлэлиир нолуогу төлөөччүлэргэ нолуок ыстаапката 6 %-тан 5 %-ҥа диэри аччыаҕа», — диэн иһитиннэриигэ этиллэр.

Тыа хаһаайыстыбатын бородууктатын оҥорон таһаарыытынан дьарыктанар урбаанньыттарга, сыана үрдээһинин учуоттаан, 2022-2024 сылларга дохуот эбийиэгэр нолуок төлөбүрүн судургу систиэмэтинэн 3%-тан 1%-ҥа диэри намтыаҕа.

Саха сирин нолуогун туһунан политикатыгар тустаах уларытыылары сэтинньи 30 күнүгэр Ил Түмэн мунньаҕар киллэрдилэр.