«Үөрэҕирии» национальнай бырайыак чэрчитинэн Суоттуга саҥа оскуола үлэҕэ киирдэ

Тохсунньу 14 күнүгэр Уус Алдан улууһун Оҕуруоттаах сэлиэнньэтигэр 220 миэстэлээх саҥа орто оскуола үлэҕэ киирдэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Бу иннинэ үөрэнээччилэр түөрт сиринэн үөрэнэн кэллилэр. 1975 сыллаахха тутуллубут эргэ оскуола дьиэтэ хаарбах туруктааҕынан тоҕус сыл анараа өттүгэр көтүрбүттэр.

«Үөрэтии саҥа эйгэтэ туһааннаах тутууну ирдиир. Хаарбах оскуолаҕа үрдүк хаачыстыбалаах үөрэҕи биэрэр кыаллыбат. «Үөрэҕирии» национальнай бырайыак көмөтүнэн оройуоннарга уонна куораттарга ирдэбилгэ эппиэттиир саҥа эбийиэктэр тутуллаллар», — диэн Ил Дархан Айсен Николаев эрдэ эппитэ.

СӨ бырабыыталыстыбатын аатыттан сэлиэнньэ олохтоохторун вице-премьер Сергей Местников бэлиэ күнүнэн эҕэрдэлээтэ уонна бырабыыталыстыба аатыттан үлэһиттэргэ махтал суругу, оскуола библиотекатыгар 100 уус-уран кинигэҕэ сертификаты бэлэхтээтэ.

4 497 квадратнай миэтэрэ иэннээх икки этээстээх оскуола үөрэнэр кылаастарын таһынан лабораторнай кэбиниэттэр, мастарыскыайдар, лингафоннай мультимедийнэй кэбиниэт, конференц-саала, спорт саала, үҥкүү хоһо, библиотека, 78 миэстэлээх аһыыр саала бааллар. Оскуола сиригэр анал футболлуур хонуу, сүүрэр сир уонна спорт былаһаакката баар. Оскуолаҕа цифровой уонна гуманитарнай хайысхалаах «Точка роста» киинэ уонна Цифровой үөрэтэр эйгэ кэбиниэтэ тэрилиннэ.

Санатан эттэххэ, «Үөрэҕирии» национальнай бырайыак чэрчитинэн өрөспүүбүлүкэ киин куоратын «Прометей» 68-с кыбаарталыгар 990 миэстэлээх саамай улахан оскуола тутуллуоҕа. Итиэннэ, Уус Алдан Бороҕонугар 450 миэстэлээх уонна Кэбээйи Сайылык сэлиэнньэтигэр 275 үөрэнээччигэ аналлаах оскуолалара тутуллуохтара.