Регионнааҕы ЫБММ Саха сиригэр олорор дьиэҕэ баһаар ахсаана элбээбитин бэлиэтээтэ

2022 сыл саҕаланыаҕыттан өрөспүүбүлүкэҕэ 90-тан тахса баһаар бэлиэтэннэ. Баһаардар үксэ олорор дьиэҕэ буолбуттара бэлиэтэннэ. Бу туһунан регионнааҕы ЫБММ пресс-сулууспата иһитиннэрэр.

Биэс киһи араас истиэпэннээх эчэйиини ылла, ол иһигэр икки оҕо. Баһаарынайдар 65-тан тахса киһини быыһаатылар.

Биэдэмистибэ иһитиннэриитинэн, ааспыт сылтан Алдаҥҥа, Анаабырга, Үөһээ Бүлүүгэ, Үөһээ Халымаҕа, Кэбээйигэ, Ленскэйгэ, Муомаҕа, Намҥа, Өймөкөөҥҥө, Сунтаарга, Уус Майаҕа, Хаҥаласка, Нерюнгригэ баһаар ахсаана элбээбитэ көстөр.

Баһаар тахсыбыт сүрүн биричиинэлэрэ буолаллар: электричество ситимиттэн уонна электроприбордартан умайыы; оһоҕу оттууга быраабылалары тутуспат буолууттан.

Саҥа дьыллааҕы бырааһынньыктар кэнниттэн Өлүөхүмэҕэ, Алдаҥҥа уонна Дьокуускайга улахан баһаардар бэлиэтэннилэр. Судаарыстыбаннай баһаарынай надзор уорганнара олорор дьиэлэргэ сэрэтэр үлэлэри күүһүрдэллэр, ону тэҥэ өрөспүүбүлүкэ борокуратууратын кытта тэҥҥэ тэрилтэлэргэ хонтуруоллуур тэрээһиннэри ыытар былааннаахтар.