Россияҕа биир ыйынан киэҥ эйгэҕэ «Спутник Лайт» вакцина тахсыан сөп

«Спутник Лайт» коронавирус утары вакцинаны оҥорон таһаарбыт «Р-Фарм» хампаанньа бөлөҕө, препарат биир ыйынан киэҥ эйгэҕэ тахсыан сөбүн этэр. Бу туһунан ТАСС иһитиннэрэр.

Иһитиннэриини хампаанньа генеральнай дириэктэрэ Василий Игнатьев эттэ.

«Уон күн анараа өттүгэр доруобуйа харыстабылын министиэристибэтэ «Спутник Лайт» вакцинаны регистрациялаабыта. Регистрацияны ааспытын кэннэ, үксүгэр, препарат биир ый иһигэр киэҥ эйгэҕэ тахсар», — диэтэ кини.

«Спутник Лайт» — 2020 сыл атырдьах ыйыгар аан дойдуга бастакынан регистрацияламмыт коронавирус утары «Спутник V» вакцина бастакы компонена. Бу саҥа коронавирус генетическай информациятын транспортировкалыыр туһугар киһи аденовируһугар олоҕурбут векторнай препарат буолар.

Вакцина Россияҕа ыам ыйын 6 күнүгэр регистрацияламмыта. Бүтэһик дааннайынан, «Спутника V» көдьүүһэ 97,6 %-ҥа тэҥнэһэр.