Россияҕа «Знание» уопсастыба саҥа састааба бигэргэннэ

Москва куоракка тэрилтэ үһүс сийиэһигэр, «Знание» уопсастыба саҥа састааба бигэргэннэ. Бу туһунан ТАСС иһитиннэрэр.

Кэтиир сэбиэт бэрэссэдээтэлинэн Россия бэрэсидьиэнин дьаһалтатын салайааччытын бастакы солбуйааччыта Сергей Кириенко талылынна.

Кэтиир сэбиэт бэрэссэдээтэлин солбуйааччыларынан дойду бэрэсидьиэнин көмөлөһөөччүлэрэ Владимир Мединскэй, Максим Орешкин, Андрей Фурсенко, ону тэҥэ Любовь Духанина буоллулар.

«Знание» уопсастыба генеральнай дириэктэринэн «Нетология-групп» холдинг уонна «Фоксфорд» үөрэтэр онлайн-сервис төрүттээччитэ, ону тэҥэ «Лидеры России. Политика» куонкурус кыайыылааҕа Максим Древаль талылынна.

Маны таһынан, кэтиир сэбиэккэ үөрэҕирии миниистирэ Сергей Кравцов, култуура миниистирэ Ольга Любимова, наука уонна үрдүк үөрэх миниистирэ Валерий Фальков, Россия ыччатын баһылыга Александр Бугаев уонна Россия наукатын академиятын бэрэсидьиэнэ Александр Сергеев киирдилэр.

Кулун тутар 26 күнүгэр дойду бэрэсидьиэнэ Владимир Путин кыттыылаах «Россия — страна возможностей» коммерческайа суох автономнай тэрилтэ кэтээн көрөр сэбиэтин мунньаҕар, Максим Древаль Сэбиэскэй Сойууска буолбут уһулуччулаах сырдатыыга уонна үгэстэргэ тирэҕирэн, билии-көрүү аныгы уонна технологическай платформатын тэрийэргэ этии киллэрдэ. Маннык үлэ холобурунан «Знание» уопсастыба ааттанна.

Владимир Путин бу идеяны муус устар 21 күнүгэр өйөөбүтэ уонна федеральнай мунньахха туһаайыытыгар «Знание» уопсастыба билиҥҥи цифровой платформаҕа көһөрө уһулуччу суолталааҕын бэлиэтээбитэ.

«Аныгы цифровой платформаҕа «Знание» уопсастыба үлэтин сөргүтүөххэ наада. Кэлиҥҥи сылларга баар курдук эрээри, улаханнык биллибэт», — диэтэ Владимир Путин.

«Знание» уопсастыба сэбиэскэй кэмтэн баҕа өттүнэн уопсастыбаннай тэрилтэ быһыытынан билиҥҥэ диэри үлэлээн кэллэ. 1992 сыллаахха РСФСР «Знание» уопсастыбата Россия «Знание» уопсастыбаҕа уларытыллыбыта, бу уопсастыбаннай түмсүү этэ. 2015 сыллаахха Россия бэрэсидьиэнин ыйааҕынан «Знание» уопсастыбаннай-судаарыстыбаннай сырдатар тэрилтэтэ тэриллибитэ, сүрүн соруга — сырдатыы үлэтэ.